နှစ်သစ်၏အဓိပ္ပာယ်

• Posted: 12:30:00 PM
• |
• Author: Winkabar

မနေ့က (ဖေဖော်ဝါရီ ၇ရက်နေ့) က တရုတ်နှစ်သစ်ကူးပါ။ တရုတ်ပြက္ခဒိန်အရ နောက်ထပ်နှစ်သစ်တစ်နှစ်ကိုကူးပြောင်းသွားပြန်ပြီ။ တစ်နှစ်ကို အကောင်တစ်ကောင်ပြောင်းတဲ့ ဒီတရုတ်နှစ် အတွက် ယခုနှစ် ၂၀၀၈ က ကြွက်နှစ်ကျပါတယ်။ နှစ်သစ်ဆိုရင် တရုတ်လူမျိုးတွေဟာအိမ်တွေသန့်ရှင်းရေးလုပ်၊ မိသားစုတွေစုဝေးပြီး ထမင်းအတူတူစုစားကြတယ်။ အဲလိုစုတဲ့အချိန်မှာ လူကြီးတွေက ကလေးတွေကို အန်ပေါင်းလို့ခေါ်တဲ့ စာအိတ်အနီရောင်လေးထဲမှာ ပိုက်ဆံထည့်ပြီးတော့ ပေးကြပါတယ်။ ကလေးတွေကပိုက်ဆံရလို့ပျော်သလို လူကြီးတွေကလည်းကလေးတွေပျော်တာကိုကြည့်ပြီးပျော်ရွှင်ကြပါတယ်။ ပြီးရင် ဘုရားရှိခိုးကြ၊ ဆုံးသွားတဲ့ဆွေမျိုးတွေကို ကန့်တော့ကြပါတယ်။ ဒါတွေက နှစ်စဉ်နှစ်တိုင်း နှစ်ကူးအချိန်ကျရင် လုပ်လေ့လုပ်ထရှိတဲ့အရာတွေပါ။


လူတွေက မင်္ဂလာအခါသမယ မှာ ( ဥပမာ ဒီလိုအချိန်ဆိုရင်) ကောင်းမှုကုသိုလ် ဒါမှမဟုတ် တစ်ခုခုသူများအတွက်အကျိုးရှိမယ့် အရာတွေကိုလုပ်ပေးဖို့ဆန္ဒရှိကြပါတယ်။ အဲလိုမျိုးလုပ်လိုက်လို့ တစ်ဖက်သားအတွက် တစ်စုံတစ်ရာအကျိုးရှိမယ်ဆိုရင် ကိုယ်လည်းဝမ်းသာရတယ် ပြီးတော့ နှစ်သစ်အတွက်လည်း အထိမ်းအမှတ်တစ်ခုအနေနဲ့ကျန်ရစ်ခဲ့ပါတယ်။ သို့သော်လည်းပဲ အဲလိုမျိုးလုပ်ဖို့က ကိုယ့်မှာ အဲလိုအခွင့်အရေးမျိုးရှိမှလည်းဖြစ်မှာပါ။ အခွင့်အရေးရလိုက်တဲ့လူအတွက်ကတော့ ဒီနှစ်ဟာ သူ့အတွက် ကံကောင်းခြင်းနဲ့စတဲ့နှစ်တစ်နှစ်လို့ပြောလို့ရမှာပါ။
xxxxxxxxxxxxxxxxxxxxx

ကားစမောင်းခါစလူတစ်ယောက်က စည်းကမ်းကိုသေချာမသိပဲမောင်းမိတော့ ရဲကဖမ်းသွားပြီး ဒဏ်ငွေတွေဆောင်ရ အမှုတွေရင်ဆိုင်ရမယ့်ကိန်းဆိုက်လာပါတယ်။ ကံဆိုးချင်တော့ သူက အင်္ဂလိပ်စကားကိုကျွမ်းကျွမ်းကျင်ကျင်မပြောတတ်ပါဘူး။ သူ့အတွက်ဘာသာပြန်ပေးမယ့် မိတ်ဆွေတစ်ယောက်အနားမှာပါပေမယ့် သူကတော့ ရဲတွေနဲ့ရင်ဆိုင်ရတာကို အရမ်းကြောက်နေခဲ့ပါတယ်။ ဘာလုပ်လို့ဘာကိုင်ရမှန်းလည်း မသိ၊ ဘာပြောလို့ ဘာဆိုရမှန်းလည်းမသိဖြစ်နေတယ်။့ ဘာသာပြန်ပေးတဲ့လူကလည်း ဘာသာပြန်ရုံကလွဲရင် ဘာမှဝင်ပြောပိုင်ခွင့်မရှိဘူးလေ။ အဲတော့ အဲဒီအမှုဖြစ်နေတဲ့လူအတွက်က ပိုပြီးအခက်တွေ့ပါလေရော့။ ဒီလိုနဲ့ပဲ ကြာလာတော့ သူနဲ့စကားပြောရတဲ့ရဲမေက သူ့ကိုသနားသွားပြီး သူ့ရဲ့မှတ်တမ်းကိုပယ်ချလိုက်တယ်။ ဆောင်ရမယ့် ဒဏ်ငွေတွေကိုလည်းလျှော့ချပေးလိုက်တယ်။ သူ့ခမျာပျော်လွန်းလို့ထခုန်မတတ်ပါပဲ။ ပြန်ခါနီး သူ့ရဲ့ မိတ်ဆွေဘာသာပြန်က ရဲမေကို ဒီနေ့အဲလိုမျိုးသူ့ကို လွတ်ပေးလိုက်တာ အရမ်းကောင်းတယ် ဘာလို့လဲဆိုတော့ ဒီနေ့က တရုတ်နှစ်သစ်ကူးမလို့ပဲ ဆိုပြီးပြောလိုက်တော့ ရဲမေက သူလုပ်လိုက်တာ အရမ်းတန်ဖိုးရှိသွားတယ်ဆိုပြီးပျော်သွားတာပေါ့။

နောက်အဖြစ်အပျက်တစ်ခုကတော့ ကျောင်းသားတိုင်းကြုံချင်တဲ့ကိစ္စပါ။ ကျောင်းက အတန်းတစ်တန်းက ဆရာမက စာသင်တာ သိပ်မကောင်းဘူး။ ကျောင်းသားအားလုံးထဲမှာမှ David ဆိုတဲ့ကျောင်းသားကတော့ ဒုက္ခအရောက်ဆုံးပေါ့။ သူက စာတွေကိုနားမလည်တော့ နားလည်အောင် tutor
တက်တယ်။ Tutor တက်တော့ စာတွေနားလည်လာပေမယ့် အိမ်စာကိုတော့မလုပ်ဖြစ်ပြန်ဘူး။ အဲလိုနဲ့အိမ်စာအဟောင်းတွေနဲ့ပဲ သံသရာလည်ပြီး အသစ်ကိုမတက်နိုင်ဖြစ်နေတယ်။
စာအကြွေးတွေက သူ့အတွက်တော့ တစ်ရက်ထက်တစ်ရက် တစ်ပတ်ထက်တစ်ပတ်ပိုများလာတာပေါ့။ ဒါပေမယ့် မနေ့ကတော့သူ့အတွက် ထီပေါက်တယ်လို့ဆိုရမှာပဲ။ ဆရာမကိုသူက စာတွေမနိုင်ဘူး အရမ်းများတယ် ပြီးတော့ သိပ်လည်းနားမလည်ဘူးလို့ပြောလိုက်တော့ ဆရာမက သင်ပုံသင်နည်းလည်းပြောင်းလိုက်တယ်။ ပြီးတော့ တရုတ်နှစ်သစ်ကူးမလို့ လက်ဆောင်ပေးတဲ့သဘောနဲ့ အိမ်စာအဟောင်းတွေကိုလည်း လုပ်စရာမလိုတော့ဘူးတဲ့။
xxxxxxxxxxxxxxxxx

ဈေးမကြီးပေမယ့် တန်ဖိုးကြီးတဲ့လက်ဆောင်တွေပါ။ လက်ခံရရှိလိုက်တဲ့လူအတွက်ကအဖိုးအဖြတ်နိုင်သလို ပေးရတဲ့လူအတွက်ကလည်း အရမ်းကိုပီတိဖြစ်ရပါတယ်။ အားလုံးပဲ အဲလိုလက်ဆောင်မျိုးပေးမယ့် လူတွေနဲ့တွေ့နိုင်သလို ကိုယ်ကလည်း ပေးနိုင်မယ့် အခွင့်အရေးမျိုးတွေနဲ့ကြုံကြပါစေလို့ဆုတောင်းပေးပါတယ်။ ပျော်ရွှင်ဖွယ်နှစ်သစ်တစ်နှစ်ကိုပိုင်ဆိုင်နိုင်ကြပါစေ။

Year Of The Rat

• Permalink
• RSS 2.0
• 
• 
• 
• 
•